Jang Lupa Beta

Beta satu-satunya di mana ale di Lahirkan, beta satu-satunya di mana ale di Besarkan, beta satu-satunya di mana ale dapat Berlindung, beta jaga, beta piara, beta satu-satunya sosok yang biking ale jadi bagini. Biar beta kasiang-kasiang biar beta kurang-kurang tapi beta seng perna lupa ale dong samua karena beta tahu beta pung ana, pung cucu, pung cece for dong samua biar su seng ada apa-apa tapi beta salalo usaha for kasi hidop dorang samua biar akang jadi jagong muda sabuah biar akang jadi papeda kasbi sabale deng biar akang jadi laor sasendo asal for lia ale dong samua bisa jadu guru yang berbobot, tentara yang setia, pegawai yang sukses, pendeta yang bermoral deng laeng-laeng lai,,,beta salalo berkorban for ale dong samua, ale dong lapar? Ada lautan yang luas…… dari pohon Baringing sampe di pante Tihnitu beta simpang samua hasil lautang for ale dong samua, ada ikan gusau, ada talor lau,ada bia garu, sampe laor jua beta simpang for ale dong samua itu kalo ale dong lapar akan hasil laut, dari tikungan Es sampe di Tihnitu dari Waelang sampe di Hatosui ada samua yang beta sediakan for ale dong samua, ada cengke deng pala, ada jagong deng kacang, ada coklat deng doriang, asal for ale dong mau kaluar bawa beta pung nama bae, asal for ale dong mau kasi harum beta pung nama di negeri orang beta akan salalo berjuang for ale dong samua tapi beta seng mau dengar orang bilang beta pung ana jadi preman di jawa, jadi pancuri, jadi pamabo, jadi pantop deng labe-labe jadi pemakai narkoba. Ana-ana,,,eee cucu-cucu,,,eee cece-cece,,,eee beta seng mau ale dong jadi bagitu yang beta mau Cuma ale dong jadi orang yang sukses orang yang hebat deng jadi orang basar kalo ale dong su jadi orang sukses beta sangat bangga karena beta pung hasil tanam beta tuai akang deng hasil yang sangat bae pula… supaya saat kajadiang deng tambaru ale dong pulang beta lia ale dong beta pung umur tamba panjang…. beta pung hati ni rasa lega… mari beta salalo tunggu ale dong pulang ada nyiur kalapa yang salalo game ale dong pulang ada omba Yanain su tunggu ale dong samua beta su siap sambut ale dong samua di tikungan Es mari pulang jua biking bagus beta lai… beta seng minta banya Cuma yang beta minta dari ale dong samua jang lupa beta.. ale dong pung negeri tercinta Hulaliu Haturessy Rakanyawa tercinta.

By : Nelson. B. Tuanakotta

Tidak ada komentar:

Kemegahan Terakhir